25-nji oktýabrda sanly ulgam arkaly geçirilen Ministrler Kabinetiniň nobatdaky mejlisine Türkmenistanyň Halk Maslahatynyň Başlygy Gurbanguly Berdimuhamedow hem gatnaşyp, ýüzlenme bilen çykyş etdi.
Türkmen halkynyň Milli Lideri ýakynda bolup geçen möhüm syýasy çäreler, olaryň guramaçylyk derejeleri dogrusynda durup geçdi.
Hususan-da, Gurbanguly Berdimuhamedow 24-nji oktýabrda BMG-niň esaslandyrylmagyna 79 ýyl bolandygyny, Türkmenistanyň Prezidentiniň bu abraýly halkara guramanyň Baş sekretary Antoniu Guterriş bilen duşuşmagynyň, ony guramanyň güni bilen gutlamagynyň uly mertebe bolup durýandygyny kanagatlanma bilen belledi. Türkmen halkynyň Milli Lideri Serdar Berdimuhamedowyň Kazan şäherinde geçirilen BRICS sammitinde eden çykyşynyň hem ähmiýeti dogrusynda belläp geçdi.
Şeýle hem Gurbanguly Berdimuhamedow Türkmenistanyň Halk Maslahatynyň Durnukly ösüş maksatlary boýunça çäreleri berk gözegçilikde saklajakdygyna ynandyrdy.
Türkmen halkynyň Milli Lideri türkmen türgenleriniň köp sanly halkara ýaryşlara gatnaşyp, baýrakly orunlary eýeländiklerini, ýurdumyzyň sport abraýyny belende göterendiklerini belledi. Bu bolsa ýurdumyzyň sport syýasatynyň gowy netijeleri berýändigine şaýatlyk edýär. Şunuň bilen baglylykda, Gurbanguly Berdimuhamedow Ministrler Kabinetiniň Başlygynyň degişli orunbasarlary, Daşary işler ministrligi bilen bilelikde halkara ýaryşlarda ýeňiji bolan türgenlerimizi sylaglamak dabarasyny geçirmek baradaky teklibi döwlet Baştutanynyň garamagyna hödürledi.
Serdar Berdimuhamedow Türkmenistanyň Halk Maslahatynyň Başlygynyň belläp geçen ähli meseleleriniň möhüm ähmiýete eýedigini belledi. “Ýaş türgenlerimiz halkara ýaryşlarda üstünlikli çykyş edip, ýurdumyzyň abraýyny belende göterýärler. Biz mundan beýläk hem olar üçin ähli şertleri dörederis” diýip, Türkmenistanyň Prezidenti aýtdy.
