Disney studiýasy Ajaýyp şazada hakda film çykarar. Bu barada Deadline neşiri habar berýär. Filmiň režissýory hökmünde “Paddingtonyň başdan geçirmeleri”, “Wonka” filmleri bilen tanalýan Pol King çykyş eder.
Ssenariýanyň üstünde Kingiň hyzmatdaşy Saýmon Farnabi işledi. Reliziň senesi we sýužet barada giňişleýin maglumatlar häzirlikçe belli däl. The InSneider portalynyň bellemegine görä, esasy rola “Toruň” ýyldyzy Kris Hemswort dalaş edýär.
Ajaýyp şazada “Zoluşka”, “Garpamyk”, “Ukudaky gözel” ýaly şa gyzlary hakyndaky köp ertekileriň personažy bolup, ol, adatça, esasy gahrymany halas edýär, onuň bilen toý tutýar. Ýöne şol bir wagtyň özünde-de, ol hemişe ikinji derejeli gahryman bolup galýar. Bellemeli ýeri, täze film ýokarda agzalan ýa-da beýleki ertekiler bilen baglanyşykly bolman, Şazada barada özbaşdak bir waka bolar.
