Hytaýly alymlar Szýansi welaýatynyň Meýlin şäherinde häzire çenli belli gazylyp tapylan dinozawr ýumurtgalaryndan iň kiçisini tapdylar. Bu barada Hytaýyň “Keszi žibao” ylmy portaly ýazýar.
Diametri bary-ýogy 29 mm bolan ýumurtga heniz 2021-nji ýylda alty ýumurtgadan ybarat örümiň düzüminde tapyldy, ýöne alymlara ýumurtgalaryň giçki hek döwründe ýaşan teropod dinozawrlaryna degişlidigini indi tassyklamak başartdy. Tapyndynyň ýaşy 80 mln ýyl diýlip hasaplanylýar.
Ýumurtga daşa öwrülen dinozawr ýumurtgalarynyň baý çeşmesi hökmünde belli bolan Gançžou derýasynyň basseýninde tapyldy. Mundan öň Hytaýda iň kiçi diýlip 45,5x40,4x34,4 mm ululykdaky dinozawr ýumurtgasy hasaplanylýardy. Täze açyş mezozoý döwründe ýaşan dinozawrlaryň köpdürlüligini öwrenmekde möhüm ädim boldy.
Ylmy gözleg ýumurtganyň uly bolmadyk ýyrtyjy teropod dinozawryna degişlidigini görkezdi. Tapylan ýumurtganyň aýratynlygy onuň süýrümtik şekili, ýuka gabygy we düwün hem gurçuk şekilli nagyşlar bilen çylşyrymly üstüniň bolmagydyr.
Netijeleri Historical Biology žurnalynda neşir edilen açyş dinozawrlaryň reproduktiw aýratynlyklary we olaryň ewolýusion ösüşi baradaky bilimleri ep-esli giňeldýär.
