Hytaýyň Guansi welaýatynyň Fumian şäherinde görkezme üçin çykarylan ägirt uly jins balagy ululygy boýunça rekordy täzeledi. Jins balagynyň uzynlygy 76,34 m (250 fut 5 dýuým), bil ölçegi 58,164 m (190 fut 10 dýuým) bolup, bu onuň boýunyň Italiýadaky Piza diňi (55 m; 180 fut) bilen Azatlyk heýkeliniň (93 m; 305 fut) aralygynda durýandygyny aňladýar diýip, Ginnesiň rekordlar kitabynyň saýtynda habar berilýär.
Uzynlygy 5,5 km matadan taýýarlanan bu balak 7,8 m uzynlykdaky syrma we diametri 1,2 m bolan poslamaýan polatdan ýasalan uly ilik bilen üpjün edildi, onuň agramy bolsa 3,6 tonna barabar.
Mundan öň iň uly jins balagynyň beýikligi 65,50 m, ini 42,70 m barabardy, ol 2019-njy ýylyň 19-njy fewralynda Peruwyň Lima şäherinde Paris Peru tarapyndan döredildi.
Önüm Ýuýlin şäherinde Yixing Textile Co., Ltd kompaniýasy tarapyndan öndürildi, taslamadan we dokmaçylykdan başlap, biçime we tikime çenli ähli işler özbaşdak ýerine ýetirildi.
Bu jins balagyny taýýarlamak üçin 18 gün sarp edildi we 30-dan gowrak tikinçi işe çekildi.
Hytaýda gündelik jins balaklaryny öndürmek boýunça iň uly merkezleriň biri hökmünde ykrar edilen Fumian “Balaklaryň dünýä paýtagty” we “Hytaýda gündelik egin-eşikleriň meşhur şäheri” ýaly titullary uly buýsanç bilen göterýär.
Belläp geçsek, aýyň başynda Şanhaýdaky Sunset aýdym-saz festiwalynda balaklar bilen bagly ýene bir rekord goýuldy. 2352 muşdak tarapyndan gol çekilen iň uly balak New Pants rok-toparyna garaşylmadyk sowgat hökmünde berildi.
