16-njy oktýabrda Pakistan Yslam Respublikasynda Şanhaý Hyzmatdaşlyk Guramasynyň (ŞHG) Hökümet baştutanlarynyň Geňeşiniň mejlisi geçirildi. Mejlise Türkmenistanyň daşary işler ministri Raşid Meredowyň ýolbaşçylygyndaky gatnaşdy diýip, DIM-niň metbugat gullugy habar berdi.
R.Meredow çykyşynda häzirki wagtda Türkmenistan bilen ŞHG-niň arasyndaky hyzmatdaşlyga täze itergi bermek üçin obýektiw we hakyky mümkinçilikleriň bardygyny belledi. Ulag, aragatnaşyk, energetika, söwda we maýa goýum işi özara hyzmatdaşlygyň ileri tutulýan ugurlarynyň hatarynda görkezildi.
Şunuň bilen baglylykda, ŞHG agza ýurtlar we hyzmatdaşlar bilen, hususan-da TOPH gaz geçirijisiniň taslamasy ýaly territorial we gurluş taýdan özara baglanyşykly geljegi uly bilelikdäki taslamalaryň durmuşa geçirilmegine ünsi jemlemek teklip edildi.
Ulag-logistika ulgamyndaky hyzmatdaşlyk meselesine degip geçen türkmen wekiliýeti, Hazar deňziniň gündogar kenarýakasy boýunça Eýrana we Hindistana çykalgasy bolan «Demirgazyk - Günorta» ulag geçelgesiniň ähmiýetini nygtady.
Söwda dolanyşygyny mundan beýläk hem ýokarlandyrmak we işewür toparlaryň arasynda göni aragatnaşyklary giňeltmek üçin uly mümkinçilikleriň bardygy bellenildi.
