2024-nji ýylyň oktýabr aýynda Ýewropa kosmos agentligi (ESA) SpaceX bilen bilelikde Falcon 9 kysymly göteriji raketany ulanyp, Hera apparatyny uçurdy. Bu missiýanyň esasy maksady – NASA-nyň 2022-nji ýylda traýektoriýasyny üýtgetmek üçin synag geçiren Dimorfos asteroidini jikme-jik öwrenmekdir.
Şeýle-de bolsa, häzirlikçe maksadyna barýan ýolda Ýerden 1,6 million kilometr aralykda ýerleşýän apparat planetamyzyň we Aýyň ilkinji suratlaryny Ýere iberdi.
Suratlar üç dürli enjamdan alyndy.
Birinji suratda AFC kamerasy 11-nji oktýabrda Ýeriň Ýuwaş ummanynyň Gün şöhlesi düşýän tarapyndan şekilini surata aldy. Bu kamera 1020x1020 durulykda monohrom görünýän ýagtylyk datçiginden ybarat. AFC ylmy barlag we nawigasiýa üçin ulanylar.
Beýleki bir surat infragyzyl surata düşürmek üçin döredilen TIRI guraly bilen alyndy. Bu gural geljekde asteroidiň üstüniň fiziki häsiýetlerini kesgitlemäge kömek eder. Suratda Ýer ABŞ-nyň gündogar kenarlary we Atlantik ummany tarapdan görünýär.
HyperScout H apparaty bilen alnan üçünji surat Ýeriň we Aýyň ýalňyş reňkli şekili. Niderlandlarda döredilen bu gural Dimorfos we Didimos asteroidleriniň mineral düzümini seljermek üçin ulanylar.
