Hindistanda täze toý möwsümi badalga alýar. Hindistanyň Söwda konfederasiýasynyň çaklamalaryna görä, geljekki dabaralar ýurduň ykdysadyýetine 70 mlrd dollardan gowrak girdeji getirer diýip, TASS belleýär.
Hindistanda toý durmuşdaky esasy waka bolup, islendik baýramçylykdan we ýubileýden has wajyp hasaplanýar. Ene-atalar bu dabara çaga doglandan taýýarlanyp başlamak bilen, pul we galyň ýygnaýarlar. Hindi toýunyň býujeti islendik sosial gatlak üçin örän uludyr.
Adatça, toý möwsümi hasyly ýygnamagyň tamamlanmagy bilen başlanýar. Bu döwürde köp sebitlerde howanyň gyzgynlyk derejesi düşüşýär. Bu hem açyk howada geçirilýän köpçülikleýin dabaralar üçin möhümdir. Baýram etmeklik üç günläp dowam edýär we däp-dessurlar, hödür-keremler, aýdymdyr tanslar bilen geçýär.
Güýzde toýlar dekabr aýynyň ortasyna çenli tutulýar. Täze ýylda olar ýanwar aýynyň ortalaryndan mart aýyna çenli geçiriler. Bilermenleriň çaklamalaryna görä, şu möwsümde Hindistanda tutuş ýurt boýunça 4,8 mln toý bolar, bu geçen ýylky 3,5 mln görkezijiden ep-esli köpdür. Bu şu ýyl maşgala gurmak üçin hindi ynançlary we astrologiýa nukdaýnazaryndan sähetli seneleriň köpdügi bilen baglanyşyklydyr. Hindistanda toý güni hökmany ýagdaýda astrolog bilen ylalaşylýar.
