BMW iki aýry wersiýalarda: elektrikli we benzinli görnüşde elýeterli boljak täze M3 modeliniň öndürilendigini habar berdi diýip, Bimmer Today-e salgylanýan IXBT habar berýär.
BMW M-iň başlygy Frenk wan Miliň sözlerine görä, elektrik wersiýasy dört hereketlendiriji bilen üpjün ediler we has ýokary kuwwaty - 1341 at güýjüni öndürer. Bu wersiýa eýýäm 2022-nji ýyldan bäri jemgyýetçilik ýollarynda synagdan geçirilýär we ýakyn wagtda bazara çykmagyna garaşylýar.
M3-iň ýakynda çykjak benzin wersiýasy barlagdan geçen, 3,0 litrlik goşa turbo görnüşli, 6 silindrli hereketlendirijisini ulanmagy dowam etdirer. Wan Mil kompaniýanyň inženerleriniň onuň geljekde zyňyndy düzgünlerine, esasanam Ýewropa Bileleşiginiň çägine laýyk gelmegini üpjün etmegiň üstünde işleýändigi sebäpli, hereketlendirijiniň köp ýyllaryň dowamynda gerekli bolup galjakdygyny aýtdy.
Benzin wersiýasy, ähtimal, elektrikli görnüşi ýaly kuwwatly bolmaz, onuň ýeňil agramy netijeli öndürijiligi üpjün etmelidir.
Güýç gurluşyndaky tapawudyndan başga-da, M3-iň iki wersiýasy dürli platformalara esaslanar. Elektrik modeli BMW-niň ýörite Neue Klasse EV platformasynda işlenip düzüler, benzin wersiýasy bolsa häzirki M3-de ulanylýan CLAR platformasynyň täzelenen görnüşini ulanar.
Wan Mil gibrid tehnologiýanyň ulanyljagyny-ulanylmajagyny takyk aýtmady, ýöne bu iň soňky M5 modelinde görkezilişi ýaly, mümkindir.
