12-nji oktýabrda Magtymguly adyndaky milli sazly drama teatrynda Türkmenistanyň we Mongoliýanyň artistleriniň bilelikdäki konserti geçirildi. Bu barada resmi metbugatda habar berildi.
Prezident Uhnaagiýn Hurelsuhyň Türkmenistana döwlet saparynyň çäklerinde guralan bu döredijilik çäresini geçirmek üçin Mongoliýanyň döwletiň medeniýet we sungat ussatlaryndan ybarat wekiliýet ýurdumyza geldi. Çäräniň açylyş dabarasyna ugurdaş edaralaryň, köpçülikleýin habar beriş serişdeleriniň ýolbaşçylarydyr wekilleri, ýurdumyzyň döredijilik işgärleri, ýokary okuw mekdepleriniň professor-mugallymlary, talyplar gatnaşdylar.
Çykyş edenleriň nygtaýyşlary ýaly, Aşgabatda bilelikdäki konsertiň geçirilmegi ikitaraplaýyn gatnaşyklary işjeňleşdirmäge, döredijilik intelligensiýasynyň wekilleriniň hünär gatnaşyklaryny ösdürmäge, birek-biregiň taryhyna, ruhy mirasyna halklarymyzyň gyzyklanmalaryny artdyrmaga ýardam eder.
Türkmenistanyň we Mongoliýanyň sungat ussatlarynyň konsert maksatnamasyna aýdymlar, folklor-tans çykyşlary girizildi.
