TikTok programmasyny işläp düzüji Hytaýyň ByteDance kompaniýasy Ola Friend ady bilen açyk görnüşli nauşniklerini hödürledi. Olar ses kömekçisiniň funksiýasyny ýerine ýetirýändigi we emeli aň funksiýalaryny goldaýandygy bilen tapawutlanýar.
Mysal üçin, ulanyjy nauşnikden häzir ýaňlanýan aýdymyň ýerine ýetirijisi barada giňişleýin maglumat bermegi, bellibir aýdym-saz žanryny açmagy, adamyň häzir ýerleşýän nätanyş ýeri barada gürrüň bermegi sorap biler. Şeýle-de, iňlis dilinden göni terjime funksiýasy bar – adam daşary ýurtly bilen gürleşip, söhbetdeşiniň gürrüňiniň sinhron terjimesini eşidip biler.
Emeli aň funksiýalarynyň işine Doubao neýroulgamy jogap berýär. Bu ChatGPT-niň hytaý analogy hökmünde häsiýetlendirilýän ByteDance-iň hususy işläp taýýarlamasydyr. Nauşnikde çat-botuň işlemegi üçin smartfona Doubao programmasyny ýükläp almaly.
Şeýle-de, Ola Friend nauşnikleri üýtgeşik forma eýe boldy. Olaryň korpusy türgenleşik ýa-da çalt ýöriş wagtynda gaçmaz ýaly gulagy “gujaklaýan” ýalydyr. Bir nauşnigiň agramy bary-ýogy 6,6 gram, plastik korpus dört reňk bilen bezelen: çal, ak, gara we ýiti benewşe. Gurluşyň beýleki aýratynlyklarynyň arasynda goşa mikrofon, işjeň galmagy basyş goldawy, keýsden goşmaça zarýad bermezden 10 sagada çenli awtonomlyk bar.
Ola Friend 17-nji oktýabrda satuwa çykar we häzirlikçe diňe Hytaýda elýeterli bolar. Ony Alibaba-dan Tmall we JD.com dükanlarynda satyn almak bolar. Dünýä bazaryna çykyş barada maglumat ýok. Olaryň bahasy 1199 ýuan ($170 töweregi).
