10-njy oktýabrda Mongoliýanyň Prezidenti Uhnaagiýn Hurelsuh ilkinji döwlet sapary bilen Türkmenistana geldi diýip, TDH habar berýär.
Aşgabadyň Halkara howa menzilinde milli lybasly oglanjyk we gyzjagaz Prezident Uhnaagiýn Hurelsuha duz-çörek hödürlediler, gül dessesini gowşurdylar.
Howa menzilinden belent mertebeli myhmanyň awtoulag kerweni sapar wagty özi üçin niýetlenen, paýtagtymyzyň kaşaň “Oguzkent” myhmanhanasynda ýerleşýän kabulhanasyna tarap ugrady.
Aşgabatda geçiriljek ýokary derejeli taryhy duşuşyk ýurtlarymyzyň ikitaraplaýyn we köptaraplaýyn hyzmatdaşlygy, iri halkara guramalaryň, ilkinji nobatda, Birleşen Milletler Guramasynyň çäklerinde gatnaşyklary işjeňleşdirmäge ygrarlydygyny tassyklamak bilen, häzirki zaman türkmen-mongol hyzmatdaşlygynyň senenamasynda möhüm sahypany açar. Prezidentler Serdar Berdimuhamedow we Uhnaagiýn Hurelsuh özara gyzyklanma bildirilýän meseleleriň giň toplumy boýunça pikir alşarlar hem-de iki ýurduň bar bolan ägirt uly mümkinçiliklerini, gazananlaryny nazara almak bilen, hyzmatdaşlygyň täze ugurlaryny kesgitlärler. Deňhukuklylyk, özara bähbitlilik esasynda ýola goýulýan söwda-ykdysady hyzmatdaşlygy diwersifikasiýalaşdyrmaga we giňeltmäge, türkmen hem mongol halklarynyň özara düşünişmegine, jebisleşmegine ýardam berýän däp bolan medeni-ynsanperwer gatnaşyklary işjeňleşdirmegiň mümkinçiliklerine aýratyn üns çekiler. Ara alyp maslahatlaşmalaryň gün tertibine girizilen meseleler Türkmenistanyň we Mongoliýanyň netijeli dialogy mundan beýläk-de işjeňleşdirmäge özara gyzyklanma bildirýändiklerini subut eder. Şunda iki ýurt hem deňhukukly hyzmatdaşlar hökmünde çykyş edýärler, olary milli ykdysadyýetleri çalt depginler bilen ösdürmek, halklarynyň abadan, bagtyýar durmuşyny üpjün etmek ýaly maksatlar birleşdirýär.
Garaşylyşy ýaly, ýokary derejeli türkmen-mongol gepleşikleriniň netijeleri boýunça möhüm ikitaraplaýyn resminamalaryň birnäçesine gol çekiler. Bu resminamalar iki tarapyň hem milli bähbitlerini, durmuş-ykdysady ösüşiniň ileri tutulýan ugurlaryny nazara almak bilen, köpugurly döwletara dialogy hemmetaraplaýyn ösdürmegiň binýadyny goýar. Mongoliýanyň Prezidenti ýurdumyza döwlet saparynyň çäklerinde beýik türkmen şahyry we Gündogaryň akyldary Magtymguly Pyragynyň doglan gününiň 300 ýyllygyna bagyşlanan «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara foruma hormatly myhman hökmünde gatnaşar.
Belent mertebeli myhman üçin türkmen paýtagtynyň gözel künjekleri bilen tanyşlygy öz içine alýan giň gerimli medeni maksatnama taýýarlanyldy.
