Milliarder Mark Sukerberg öz aýaly üçin uzaldylan Porsche Cayenne Turbo GT-ni sargyt etmek üçin West Coast Customs kompaniýasyna kömek sorap ýüz tutdy. Netijede, kuwwatly Cayenne GT krossoweri miniwene öwrüldi.
Sukerbergiň aýtmagyna görä, Prissilla Çan miniwen isleýärdi, ýöne Porsche-niň şeýle kuzowly awtomobilleri satmaýandygy üçin, Sukerberg işi öz eline almaly boldy. Ol elektrik süýşürilýän gapylar bilen üpjün edilen miniweniň taslamasyny özüniň taýýarlandygyny aýdýar. Bu Porsche-ni döretmek üçin azyndan iki Cayenne gerek boldy: krossower kuzowdaky üýtgeşmeleriň hasabyna uzaldyldy. Salonda üç hatar oturgyç ýerleşdirildi.
Öň, West Coast Customs kompaniýasy Sukerbergiň sargydy boýunça mehaniki herekete getiriji guty bilen Porsche 911 GT3 Touring we üç pedally Cadillac CT5-V Blackwing awtomobillerini döredipdi. Uzaldylan Porsche Cayenne Turbo GT-niň bahasynyň näçe bolandygy belli däl, ýöne adaty modeliň ilkibaşdaky bahasy 200 000 dollardan geçýär.
Porsche Cayenne Turbo GT-ni Ýewropada ekologiýa ülňülerine laýyk gelmeýändigi sebäpli satmaýar. ABŞ-da bolsa kross-kupe 659 at güýjüni berýän hereketlendiriji bilen üpjün edilýär we ol 3,3 sekuntda tizligini 100 km/sag çenli artdyryp bilýär. Onuň esasynda döredilen miniwen göwrüm taýdan ulalyp, agyrlaşandygy üçin, dinamikligini ýitiren bolsa gerek.
