Dünýäniň iň uly bäş neşirýaty (Elsevier, Cengage, Hachette, Macmillan we McGraw Hill) we tanymal ýazyjy Skott Turou Meta-ny kazyýete berdi. Olar Mark Sukerbergi we onuň kompaniýasyny «Llama» atly emeli aňy okatmak üçin millionlarça kitaby bikanun ýollar bilen ulanmakda aýyplaýarlar.
Aýyplamada bu bikanun işlere Sukerbergiň hut özüniň rugsat berendigi aýdylýar. Maglumatlara görä, Meta kompaniýasy awtorlyk hukugy goralýan eserleri dürli garakçy saýtlardan we torrentlerden göçürip alypdyr. Hatda kompaniýanyň içki resminamalarynda bu maglumatlaryň ogurlykdygy-da anyk ýazylypdyr.
Aslynda, Meta bu kitaplary kanunylaşdyrmak üçin 200 million dollar tölemek barada gepleşikler hem geçirip başlapdyr, ýöne Sukerbergiň özi bu tölegi amala aşyrmagy bes etmegi buýrupdyr. Ol pul tölemegiň ýerine, Amerikan kanunçylygyndaky «mugt ulanmak» düzgüninden peýdalanmagy makul görüpdir.
Kazyýete berlen maglumatlarda görkezilişi ýaly, ogurlanan materiallaryň mukdary 267 terabaýta ýetýär. Bu bolsa ýüz millionlarça neşir diýmekdir. Ýazyjylar we neşirýatlar häzirki emeli aňyň adamyň ýazuw stiline meňzedip, asyl eserleriň ýerini tutýan täze zatlary döredýändigine we onuň «ogurlyk enjamyna» öwrülendigine gaharlanýarlar.
Meta kompaniýasynyňkylar bolsa bu aýyplamalara garşy kazyýetde berk durjakdyklaryny bildirdi. Olaryň pikiriçe, emeli aňy bar bolan kitaplarda okatmak täze bir tehnologiýany döretmek bolup durýar we bu kanuna asla ters gelmeýär.
