NASA-nyň 2012-nji ýyldan bäri Marsda hereket edip gelýän Curiosity mars roweri sag ortaky tekerine uly zeper ýetdi. Mars Hand Lens Imager (MAHLI) kamerasy arkaly düşürilen soňky suratlarda teker daşkylaryndaky ýyrtylan yzlar we deşikler görünýär. Bu deşiklerden tekeriň içindäki mehanizmler açylýar diýip, Live Science habar berýär.
Muňa garamazdan enjam işlemegini dowam etdirýär.
Curiosity ilkibaşda iki ýyllyk missiýa üçin niýetlenipdi. Iki ýyla derek ol eýýäm Gyzyl planetada 4323 sol (sol=Mars güni - 24 sagat 39 minut we 35,24409 sekunt) bolup, Geýl kraterini we onuň töweregini gözden geçirdi. Bu döwürde mars roweri 32 km-den gowrak ýol geçip, Mars atmosferasynda gözlegleri geçirdi we bu ýerde ýaşaýşyň yzlaryny gözledi. Şeýle hem rower Gyzyl planetada kitap şekilli daş, mineral gül, Star Trek-iň nyşany we “başga planetalynyň” syrly gapy jaýy ýaly köp sanly “artefaktlary” tapdy.
Inžener Eşli Stroup tekere ýeten zeper uly ýaly bolup görünýänem bolsa, mars roweriniň “durnukly işlemegini” dowam etdirýändigini aýtdy. Bu zeperiň takyk haçan ýeteni belli däl we Curiosity-iň beýleki tekerleriniň hem ýagdaýy belli däl.
Enjamlarynyň könelişendigine garamazdan, Curiosity-niň heniz işini tamamlamak niýeti ýok. Işlemegini bes eden halatynda ol Hytaýyň Zhurong-y we NASA-nyň Ingenuity dikuçary ýaly, Marsda durup galan beýleki robotlara goşular.
