“Formula-1” çempionatynyň eýesi Liberty Media holdingi LVMH lýuks ägirdi bilen 10 ýyllyk şertnama baglaşdy. Onuň çäklerinde hyzmatdaşlyga Louis Vuitton, Moet Hennessy we TAG Heuer ýaly birnäçe meşhur brendler gatnaşar.
Gözellik pudagynda dünýä lideri bilen “patyşalyk ýaryşlarynyň” arasyndaky şertnama indiki möwsümiň başynda güýje girer.
Şeýlelikde, TAG Heuer sagat brendi sportuň bu görnüşinde resmi hronometrçi hökmünde Rolex-iň ornuny eýelär. Bu ädim Şweýsariýa kompaniýasy bilen 12 ýyllyk hyzmatdaşlyga nokat goýar, ýöne TAG-yň “Red Bull” ýa-da Monakonyň Gran-prisi bilen häzirki şertnamasyna täsir etmez.
F1 bilen LVMH konglomeratynyň arasyndaky gatnaşyk geçen ýyl kompaniýanyň Moet Hennessy brendi Las-Wegasyň Gran-prisine hemaýatkär bolandan soň ösüp başlady.
“LVMH we Formula-1 – Liberty Media-nyň esasy gymmatlyklary bolan döredijiligiň we innowasiýanyň serhetlerini yzygiderli giňeldýän iki sany global brend. Biz geçen ýyl Las-Wegasyň Gran-prisinde LVMH öýleriniň biri bilen hyzmatdaşlyk etmekden hoşal bolduk, indi bolsa gatnaşyklarymyzy Topar bilen giňeldýäris, çünki ol biziň global hyzmatdaşymyza öwrüldi... Biz ýakyn ýyllarda Bernar we Frederik Arno bilen hyzmatdaşlyga sabyrsyzlyk bilen garaşýarys” – diýip, Liberty Media-nyň prezidenti Greg Maffei belledi.
