OpenAI kompaniýasy ChatGPT Plus we ChatGPT Team tölegli wersiýalara ýazylan ulanyjylar üçin ChatGPT-niň ses kömekçisi funksiýasyny işe girizýär. Ol, aslynda, dört aý mundan ozal anons edilipdi, ýöne howpsuzlyk meselelerini çözmek üçin onuň işe girizilmegi yza süýşürildi diýip, Bloomberg agentligi habar berýär.
Ýazda ulanyjylaryň ýazuw üsti we wizual soraglaryna jogap berýän kömekçi hödürlendi. Ýöne iýul aýynda funksiýa diňe käbir müşderiler üçin elýeterli boldy. Indi OpenAI bäş sany täze ses goşup, olaryň umumy sanyny dokuza ýetirmek bilen, ses kömekçisine elýeterliligi giňeldýär.
OpenAI ses kömekçisiniň meşhur adamlaryň sesine öýkünmejekdigini, sebäbi munuň heniz görkeziş tapgyrynda tankytlara sezewar bolandygyny belledi. Iň uly dawaly waka aktrisa Skarlett Ýohanssonyň sesine meňzeş ses bilen baglanyşykly boldy.
Mundan başga-da, işläp düzüjiler awtorlyk hukugyny bozýan mazmunyň döredilmeginiň öňüni almak üçin süzgüçleri işe girizdiler. Şeýle ýagdaýda çat-bot anyklap, aýdymy ýa-da başga audio görnüşini döretmek haýyşyny ret eder.
Funksiýalaryň giňeldilendigine garamazdan, jogap gaýtarmak üçin smartfonyň kamerasyny ulanýan “kompýuter görşi” ýaly mümkinçilikler heniz elýeterli däl.
