2025-nji ýylda Gyrgyzystanda “ýaşyl” şäheriň gurluşygy başlar. Bu barada Nýu-Ýorkda geçirilýän BMG-niň Baş Assambleýasynyň 79-njy sessiýasynda Gyrgyzystanyň Prezidenti Sadyr Žaparow aýtdy diýip, Trend habar berýär.
“Geljek ýyl biz Kemine şäherinde “ýaşyl” şäheriň gurluşygyna başlarys. Biz ýurdumyzyň beýleki sebitleri üçin görelde bolup hyzmat etjek we geljekki nesiller üçin arassa tebigaty gorap saklamaga ýardam etjek “ýaşyl” şäheri gurmaga çalyşýarys. Men onuň ykdysady taýdan arassa, söwda, medeni-syýahatçylyk merkezi, innowasiýa we täze tehnologiýalar merkezi boljakdygyna ynanýaryn” – diýip, Žaparow aýtdy.
Prezident YssykKöl kölüniň kenarynda döwrebap we innowasion “Asman” şäheriniň gurluşygynyň eýýäm başlanandygyny belledi.
Onuň aýdyşy ýaly, Merkezi Aziýa ählumumy howpsuzlyk we dünýä ykdysadyýeti nukdaýnazaryndan möhüm sebite öwrülýär.
“Gyrgyzystan goňşy döwletler bilen bilelikde sebitiň durnukly ösüşi boýunça işleri dowam etdirýär. Gazagystan we Özbegistan bilen bilelikde sebitiň energiýa we suw zerurlyklaryny üpjün etjek Kambar-Ata-1 gidroelektrostansiýasyny gurýarys. Şeýle-de, biz söwda we ulag hyzmatdaşlygyny güýçlendirjek hem-de yklymyň Gündogar bilen Günbataryny birleşdirjek Hytaý-Gyrgyzystan-Özbegistan demirýolunyň gurluşygyna gatnaşýarys” – diýip, Prezident belledi.
