Gyrgyzystan garaşsyzlyk ýyllaryndan bäri ilkinji gezek milli walýutasy bolan somy özbaşdak çap etmäge girişdi. Bu barada ýurduň prezidenti Sadyr Žaparow mälim etdi.
Onuň aýtmagyna görä, ozal ýurt kagyz pullary daşary ýurtlarda çap etdirýärdi we bu iş uly çykdajylary talap edýärdi. Indi bolsa pul önümçiligi respublikanyň öz içinde ýola goýuldy.
«Şu gün Gyrgyzystan üçin taryhy gün! Indi hemme zat üýtgedi. Biz eýýäm öz walýutamyzy sargyt boýunça çap edip biljek derejä ýetdik» diýip, prezident Žaparow belledi.
Täze önümçilik dünýä standartlaryna laýyk gelýändigini tassyklaýan halkara sertifikata hem eýe boldy. Şeýle-de, ýurtda iň ýokary hilli döwlet resminamalarynyň — umumy raýatlyk pasportlarynyň, ID-kartlaryň, sürüjilik şahadatnamalarynyň we awtoulaglaryň tehniki pasportlarynyň önümçiligi-de ýola goýuldy.
Žaparowyň belleýşi ýaly, indi ýurt diňe özüniň däl, eýsem beýleki döwletleriň hem pullaryny we resminamalaryny çap etmäge taýýar. Eýýäm birnäçe daşary ýurtlardan degişli sargytlar kabul edilip başlandy.
