Ermenistanyň Prezidenti Waagn Haçaturýan 2024-nji ýylyň oktýabr aýynda Türkmenistana sapar bilen geler. Bu barada Ermenistanyň Aşgabatdaky ilçisi Ruben Harazýan "Neýtralnyý Türkmenistan" gazetinde neşir edilen makalasynda habar berýär.
Ilçi Ermenistan bilen Türkmenistanyň arasynda özara ynanyşmaklyga esaslanýan berk hyzmatdaşlyk gatnaşyklarynyň ýola goýlandygyny nygtady. Söwda, ykdysadyýet, ylym we medeniýet ulgamlarynda netijeli hyzmatdaşlyk ýola goýuldy.
Waagn Haçaturýanyň saparynyň barşynda ikitaraplaýyn gatnaşyklary mundan beýläk hem ösdürmegiň meselelerini maslahatlaşmak meýilleşdirilýär. Söwda-ykdysady we medeni hyzmatdaşlyga aýratyn üns berler.
Mundan başga-da, Haçaturýan Magtymguly Pyragynyň doglan gününiň 300 ýyllygyna bagyşlanan halkara forumyna gatnaşar. Forum 11-nji oktýabrda dünýä ýurtlarynyň birnäçesiniň döwlet hem hökümet Baştutanlarynyň gatnaşmagynda geçiriler.
