Gyrgyzystanyň paýtagty Bişkekde 9-10-njy oktýabrda türki döwletleriň emeli aňa (EA) bagyşlanan sammiti geçiriler diýip, Gyrgyzystanyň Sanly ösüş ministrligine salgylanyp, 24.kg habar berýär.
Çäre Türki Döwletleriň Guramasyna agza döwletlerden, Merkezi Aziýadan we dünýäniň beýleki sebitlerinden döwlet edaralarynyň wekillerini, bilermenleri, işewürleri, alymlary we IT hünärmenlerini birleşdirer. Sammite Azerbaýjanyň, Gazagystanyň, Gyrgyzystanyň, Özbegistanyň, Türkiýäniň, şeýle-de synçy hökmünde Wengriýanyň we Türkmenistanyň wekilleri gatnaşar.
Sammitiň emeli aňyň ösüşi bilen baglanyşykly häzirki meseleleri maslahatlaşmak, onuň döwlet dolandyryşynda, işewürlikde we sosial gurşawlarda netijeli durmuşa geçirilmegi üçin tejribeler bilen alyşmak we strategiýalary işläp taýýarlamak üçin platforma bolup hyzmat etjekdigi bellenilýär.
Sammitiň esasy maksatlary türki dünýäsinde emeli aňy ösdürmek strategiýalaryny işläp taýýarlamak, innowasiýalara we tehnologiki ösüşe ýardam etmek, türki dillerini gorap saklamak we ösdürmek üçin EA ulanmak, EA pudagynda ykdysady we ylmy hyzmatdaşlygy berkitmek, EA taslamalaryna we startaplaryna maýa goýumlary çekmek, şeýle-de emeli aňdan peýdalanmagyň ahlak we hukuk taraplaryny ara alyp maslahatlaşmak bolar.
Sammitiň çäklerinde öz hünär derejelerini ýokarlandyryp, iň täze tehnologiýalar bilen tanşyp biljek IT işläp düzüjileri üçin ussatlyk sapaklary we workşoplar gurnalar.
