Anna güni geçirilen Ministrler Kabinetiniň giňişleýin mejlisinde wise-premýer M.Mämmedowa 2024-nji ýylyň oktýabr aýynda geçiriljek esasy çäreleriň we medeni-durmuş maksatly binalaryň ulanylmaga berilmeginiň tertibi barada hasabat berdi.
“Watan” habarlar gepleşiginde habar berlişi ýaly, geljek aýda dürli maslahatlary, döredijilik duşuşyklaryny, sergileri, Magtymguly Pyragynyň doglan gününiň 300 ýyllygy, Ýaşulularyň halkara güni, Hatyra güni, Saglygy goraýyş we derman senagaty işgärleriniň güni, Türkmen alabaýynyň baýramy mynasybetli dürli çäreleri geçirmek meýilleşdirilýär. Şeýle hem ozal yglan edilen döredijilik bäsleşikleriniň jemleri jemlener.
Şeýle hem Türkmenistanyň Halk Maslahatynyň mejlisinden gelip çykýan wezipeleri wagyz etmek maksady bilen, maslahatlary we wagyz-nesihat çärelerini geçirmek göz öňünde tutulýar.
Şunuň bilen birlikde, beýik türkmen şahyry we akyldary Magtymguly Pyragynyň doglan gününiň 300 ýyllygyna bagyşlanan “Döwürleriň we siwilizasiýalaryň özara arabaglanyşygy—parahatçylygyň we ösüşiň binýady” atly halkara forumy, Russiýa Federasiýasynyň we Ermenistan Respublikasynyň Türkmenistandaky Medeniýet günleri, Türki medeniýetiň halkara guramasyna agza ýurtlaryň II teatr festiwaly we beýleki çäreler guralar.
