Nike kompaniýasynyň prezidenti we baş ýerine ýetiriji müdiri Jon Donahýu 2024-nji ýylyň 14-nji oktýabryndan wezipeden gider. Bu barada kompaniýanyň müdirler geňeşiniň beýanynda habar berilýär.
Kompaniýanyň ýolbaşçysy wezipesinde onuň ornuny Nike-yň öňki top-menejeri Elliot Hill eýelär. Ol kompaniýa 1988-nji ýylda tejribeçi hökmünde gelip, 2020-nji ýylda ony sarp ediş bazarlary boýunça prezident wezipesinde terk edipdi.
Donahýu ýerine ýetiriji müdir wezipesini 2020-nji ýylyň ýanwar aýyndan bäri eýeleýär. Onuň üstünliklerine garamazdan, “The New York Times” gazeti kompaniýada onuň täzelikçi we marketolog hökmünde kabul edilmändigini belleýär.
Ýolbaşçylygyň çalşylmagy baradaky habar kompaniýanyň paýnamalarynyň, takmynan, 10% ýokarlanyp, bir paý üçin 89,26 dollara ýetmegine getirdi. Şeýle-de bolsa, bu 2021-nji ýylyň noýabr aýynda hasaba alnan 177 dollar görkezijisinden ep-esli pesdir.
Ýatlap geçsek, 2023-nji ýylyň 21-nji dekabrynda Nike çak edilen satuwyň azalandygyny habar berip, geljek üç ýylda çykdajylary 2 mlrd dollar azaltmak meýilnamasyny yglan etdi. Bu çözgüt, esasanam, Hytaýda we Ýewropada sarp edijileriň isleginiň peselmegi bilen baglanyşykly boldy.
