Arabika kofesi üçin fýuçersler 2011-nji ýyldan bäri iň ýokary derejesine çenli gymmatlady. Munuň sebäbi Braziliýada dowam edýän gurakçylyk boldy diýip, Bloomberg habar berýär.
16-njy sentýabrda geçirilen söwdada Nýu-Ýork biržasynda arabika üçin fýuçersler 4,5% - bir funt üçin 2,68 dollar ýa-da bir kg üçin 5,9 dollar gymmatlady. Arzan robusta kofe däneleriniň ýetmezçiliginiň arabika bolan islegi güýçlendirýändigi sebäpli, şu ýyl bahalar, takmynan, 40% ýokarlandy.
Öz gezeginde, 16-njy sentýabrda robusta üçin noýabr fýuçersleriniň bahasy ICE biržasynda 3,55% ýokarlanyp, bir tonna üçin 5,45 müň dollardan geçdi.
Kofe fýuçersleri bilen bagly howsalalar sebäpli JM Smucker Co. ýaly uly kofe öndürijileri eýýäm önümiň bahasyny ýokarlandyrdylar.
Belläp geçsek, Braziliýany kofe hasylyna düýpli zyýan ýetirýän soňky onýyllyklarda iň güýçli gurakçylyk gurşap aldy. Milli gözegçilik we tebigy betbagtçylyklary öňünden duýduryş merkeziniň maglumatlaryna görä, maý aýyndan awgust aýy aralygynda ýurduň käbir oba hojalygy sebitleri 1981-nji ýyldan bäri iň gurak howa duçar boldy.
