Günbatarda elektromobil satuwynyň gowşaýan wagty Hytaýda bu ýagdaý düýbünden başgaça. Awgust aýynda ýurt bir milliondan gowrak elektromobil satyp, beýleki ýurtlar üçin görlüp-eşidilmedik görkezijä ýetdi diýip, tarantas.news habar berýär.
Hytaýyň ýolagçy awtomobiller assosiasiýasynyň (CPCA) maglumatlaryna görä, Hytaýda elektromobil satuwy geçen ýylyň degişli döwri bilen deňeşdirilende 33% ýokarlandy. Şol bir wagtyň özünde, ähli görnüşli hereketlendirijili awtomobilleriň satuwy 1,1% azaldy.
Munuň tersine, ÝB-de we Beýik Britaniýada elektromobil satuwy 4% azaldy. Pese gaçyşyň sebäbi Germaniýada subsidiýalaryň ýatyrylmagy we ÝB-niň hytaý elektromobilleri üçin söwda çäklendirmeleri boldy.
Şeýle-de bolsa, elektromobillere bolan global isleg artmagyny dowam etdirýär diýip, Rho Motion gözleg kompaniýasy habar berýär. 2024-nji ýylyň başyndan bäri dünýäde 9,8 mln elektromobil satyldy, awgust aýynda ýyllyk ösüş 20% boldy.
Elektromobilleri we birikdirilýän gibridleri öz içine alýan täze birikdirilýän ulag serişdeleriniň (NEV) paýy Hytaýda ýolagçy awtomobilleriniň umumy satuwynyň rekord 53,5%-ine ýetdi.
Rho Motion-yň maglumatlar menejeri Çarlz Lesteriň pikiriçe, Hytaýda elektromobillere bolan isleg artmagyny dowam etdirer. “Aýda bir million satylan elektromobil belliginden geçmek – bu diňe bir başlangyjy” – diýip, ol belleýär. 2024-nji ýylyň ahyryna çenli bu görkezijiden ýene birnäçe gezek geçiler diýlip garaşylýar, sebäbi satuwlar adatça ýylyň ikinji ýarymynda ýokarlanýar.
