Amerikaly Ueýn Gerdes soňky nesliň Toyota Prius gibrid awtomobilinde ýangyç sarp etmek boýunça rekord goýdy. Ol adaty ýoldan hereket edip, awtoulagyň harçlaýan ýangyjyny 100 km üçin 2,5 litre çenli azaltmagy başardy. Goşmaça ýangyç guýmazdan geçilen ýol tas 1700 km-e ýetdi diýip, CarScoops habar berýär.
ABŞ-nyň günbatar kenaryndan gündogar kenaryna çenli gibrid Toyota Prius ortaça 100 km üçin 2,53 litr benzin harçlady. Bu käbir ýagdaýlarda onuň hatda bu görkezijiden pese düşendigini aňladýar. Toyota resmi taýdan bu modeliň 100 km üçin 4,13 litr ýangyç sarp edýändigini nygtaýar.
Los-Anjelesden Nýu-Ýorka çenli umumy aralyk 5200 km golaý boldy. Awtomobil ýolda deňiz derejesinden 2100 metr beýiklige çykdy, ýoluň bir bölegini bolsa Selsiý boýunça 40 gradus howa temperaturasynda geçdi. Bu şertler hem awtoulagyň ýangyjy has köp harçlamagyna getirýär.
Şeýle-de, Toyota Prius-yň bir bakda geçen ýoly öndüriji tarapyndan görkezilen görkezijiden hem artyk boldy. Toyota ýoly 1036 km töweregi diýip görkezýär, Prius bolsa goşmaça ýangyç guýmazdan tas 1700 km geçdi. Modeliň bu üstünlikleri Ginnesiň rekordlar kitabynda hasaba alyndy.
