Türkmenistanyň Milli Olimpiýa Komitetiniň Baş sekretary Ata Akmämmedow 8-nji sentýabrynda Hindistanyň Nýu-Deli şäherinde geçirilen Aziýa Olimpiýa Geňeşiniň (AOG) saýlaw Baş Assambleýasyna gatnaşdy. Bu barada Türkmenistanyň Milli Olimpiýa Komitetinde habar berdiler.
Çärä Aziýanyň ähli künjeginden wekiller gatnaşyp, sebitiň sport geljegi barada pikir alyşdylar, şeýle hem Assambleýa agza döwletler täze ýolbaşçy saýladylar.
AOG-nyň täze Prezidenti wezipesine Raja Randhir Sing saýlandy. Raja Randhir Sing, tejribeli sport dolandyryjysy we AOG-nyň wagtlaýyn Prezidenti şeýle hem, Halkara Olimpiýa Komitetiniň (IOC) agzasy bolup, ol Olimpiýa hereketinde giňden tejribe toplady. Singiň saýlanmagy, agza ýurtlaryň sport infrastrukturasyny gowulandyrmak, inklýuziýany goldamak (ähli sportçylaryň deň mümkinçiliklerden peýdalanmagyny) we Aziýanyň ýaşlaryny sporta çekmek baradaky öňden görüjilikli meýilnamasyna bolan güýçli goldawyny görkezýär.
Raja Randhir Sing öz çykyşynda, AOG-nyň ileri tutulýan ugurlaryny kesgitledi, şol sanda sebitleýin hyzmatdaşlygy ösdürmek we agza ýurtlardaky sport programmalaryny ösdürmegiň möhümdigini nygtady. Ol sport desgalaryna maýa goýmagyň zerurlygyny we sport arkaly agzybirligi pugtalandyrmagyň ähmiýetini belläp geçdi, şeýle hem Aziýanyň dünýä sport sahnasynda has güýçli orun eýelemegini maksat edinýändigini aýtdy.
