Berlinde IFA 2024 halkara elektronika sergisi (Internationale Funkausstellung Berlin) açyldy, bu ýerde öňdebaryjy öndürijiler smartfon, noutbuk, planşet, oýun ulgamlary we emeli aň ugrundan iň täze işläp taýýarlamalaryny hödürleýärler.
Emeli aň – rahatlygyň täze derejesi
Samsung: Günorta Koreýa kompaniýasy indi gytaklaýyn buýruklara düşünmäge ukyply bolan ses kömekçisi Bixby-ni hödürledi. Mysal üçin, oňa şeýle diýmek bolar: “Men öýe 18:00-da gelerin, şonuň üçin, haýyş edýärin, şol wagta çenli ähli öý işlerini tamamla”. Şondan soň ulgam kir ýuwujy we gap ýuwujy maşynlary awtomatik işe girizer, robot tozan sorujynyň kömegi bilen arassalar hem-de beýleki hojalyk işlerini ýerine ýetirer. Mundan başga-da, täze Voice ID funksiýasy maşgala agzalaryny ýatda saklaýar we olara şahsy teklipleri berýär.
Honor: Hytaý kompaniýasy golýazma tekstini tanamak, ýazuwy gowulandyrmak we hakyky wagt režiminde sözleýşi tekste öwürmek üçin emeli aň gurallary bilen Honor MagicPad 2 planşetini hödürledi.
Smartfonlar we noutbuklar: dizaýn we öndürijilik ewolýusiýasy
Honor Magic V3: Honor-yň eplenýän smartfony dünýäde iň inçe smartfonlaryň biridir.
Samsung Galaxy Book 5 Pro 360: Planşete öwrülýän 16 dýuýmlyk AMOLED displeýli noutbuk bolup, wirtual kömekçi Chat Assist, hakyky wagtda terjimeçi Live Translate we gözleg guraly Circle to Search ýaly emeli aňyň esasynda birnäçe funksiýalary goldaýar.
Honor MagicBook Art 14: AMOLED displeýli we aýrylýan kameraly örän ýeňil noutbuk.
Lenovo Auto Twist AI PC: Ulanyjynyň hereketini yzarlap, ekrany öwürýän mehanizmleşdirilen şarnirli konseptual noutbuk. Bu özboluşly gurluş barada TmCars giňişleýin gürrüň berdi.
Täze nesil oýun ulgamlary:
- Tecno Mega Mini Gaming G1: Kuwwatly Intel Core i9-13900H prosessory we Nvidia RTX4060 wideokarty bolan ykjam oýun kompýuteri.
- Tecno Pocket Go: Windows OS-yň esasynda işleýän giňeldilen hakykat äýnegi bilen innowasion oýun ulgamy.
- Acer Project DualPlay: Aýryp, aýratyn iki joýstik hökmünde ulanyp boljak simsiz oýun kontrolleri bolan noutbuk.
- IFA Berlin 2024 gajetleriň geljeginiň – ösen tehnologiýalaryň, ergonomiki dizaýnyň we emeli aňyň birleşmesidigini görkezdi.
