Müsüriň demirgazygynda arheologlar faraon Ramses II-ä degişli bolan gylyjy tapdylar. Bu barada ýurduň Syýahatçylyk we gadymy ýadygärlikler ministrligi habar berdi.
Gazuw-agtaryş işleri Buheýra muhafazyndaky Hoş-Isa şäheriniň etraplarynyň birinde geçirildi. Alymlar ol ýerde Täze Patyşalyk döwrüniň (b.e.öň XVI-XI asyrlar) ýaraglary we azyk önümleri üçin harby kazarmalaryň we ammarlaryň yzlaryny tapdylar.
“Missiýa patyşa Ramses II-niň kartuş haşamlary bilen bezelen uzyn bürünç gylyjyny tapdy” – diýip, Ministrligiň habarynda aýdylýar.
Şeýle-de, arheologlar aw gurallaryny, şaý-sepleri we şahsy arassaçylyk serişdelerini tapdylar. Mysal üçin, gazuw-agtaryş işlerinde pil süňkünden ýasalan monjuklar we gorag tumarlary tapyldy. Tapyndylaryň arasynda Gadymy Müsürde mukaddes haýwan hasaplanan sygryň jaýlanan ýeri we Ramses II-niň titullarynyň ieroglif ýazgysy bolan hek daşlary-da bar.
Ramses II Gadymy müsüriň XIX nesilşalygyndan hasap boýunça üçünji hökümdardyr. Ol 25 ýaşynda tagta çykdy we b.e.öň 1279-1213-nji ýyllarda höküm sürdi diýlip hasaplanylýar. Ramses II-niň dolandyran ýyllarynda gadymy Müsürde uly gurluşyk işleri alnyp barlypdyr, Abidos, Fiwa we Edfu şäherlerinde ybadathanalar gurlupdyr.
