44 ýaşly müsürli göreşiji Aşraf Mahrus 700 tonnalyk gämä daňylan tanapy dişinde gysyp, ony 15 metr süýşürdi. Türgen bu üstünligi Ginnesiň rekordlar kitabyna girizmek üçin arza bermek isleýär diýip, NBC News habar berýär.
Mahrusyň aýtmagyna görä, Ginnesiň häzirki rekordy 614 tonnalyk gämi bilen goýuldy. Ol öz üstünligini hasaba aldyrmak üçin surat we wideo hödürlemegi meýilleşdirýär.
Bu synaga taýýarlyk wagty türgen beloga we demre baý berhizi saklady: her gün azyndan 12 ýumurtga, iki bitin towuk we 5 kg töweregi balyk iýdi. Şeýle-de, günde üç gezek iki sagatlap türgenleşdi.
Mahrus 700 tonnalyk gämini süýşürenden soň, umumy agramy, takmynan, 1150 tonna bolan ýene iki gämini çekdi. Geljekde ol täze rekordlary goýmagy, şol sanda agramy 263 müň tonnalyk suwasty gämini süýşürmäge synanyşmagy maksat edinýär.
Aşraf Mahrus Kabonga ady bilen hem tanalýar. Ol ozal dişi bilen otlyny we lokomotiwi çekipdi, şu ýylyň martynda bolsa agramy 279 tonna bolan otly düzümini çekendigi üçin Ginnesiň rekordlar kitabyna girizildi.
