Pariždäki Oýunlaryň öňüsyrasynda Eýfel diňinde gurnalan Olimpiýa halkalary, şeýle-de häzirki wagtda Triumf arkasynda ýerleşýän Paralimpiýa hereketiniň nyşany bolan agitos 2028-nji ýylda Los-Anjelesde geçiriljek indiki Olimpiada çenli we ondan soň hem öz ýerlerinde galyp biler. Bu barada Parižiň häkimi Ann Idalgo aýtdy diýip, TASS habar berýär.
“Meniň halkalar we agitos barada eden teklibim 2028-nji ýyla çenli halkalary Eýfel diňinde, agitosy bolsa Ýeliseý meýdanynda galdyrmakdan ybarat” – diýip, Idalgo 8-nji sentýabra meýilleşdirilen Paralimpiadanyň ýapylyş dabarasynyň öňüsyrasynda geçirilen metbugat maslahatynda aýtdy.
“2028-nji ýylda göreris. Eger biz munuň az salymlyk waka däldigini ýada salýan [Oýunlaryň] esasy nyşanlary bolmazdan oňup bilmesek, belki olar galar. Belki-de ýok” – diýip, Idalgo sözüniň üstüne goşdy.
Öň, Idalgo Ouest-France gazeti bilen söhbetdeşlikde Olimpiýa halkalaryny Eýfel diňinde galdyrmak üçin Halkara Olimpiýa Komitetinden rugsat alandygyny aýtdy. Şol bir wagtyň özünde, KHBS-iň maglumatlaryna görä, gurluşlar hemişe galdyrmak üçin örän agyr, şol sebäpli Parižiň häkimiýeti täze, ýeňil halkalary sargyt etmek isleýär. Eýfel diňini döreden inžener Gustaw Eýfeliň nesilleri Idalgonyň çözgüdine garşy çykdylar.
