Ýaponiýanyň Toyota kompaniýasy we Germaniýanyň BMW awtoöndürijisi indiki nesliň wodorod ýangyç elementlerini bilelikde işläp taýýarlamagy giňeltmek meýilnamalaryny yglan etdiler. Beýanata görä, ýangyç elementlerinde işleýän elektromobilleriň ilkinji toplumyny 2028-nji ýylda köpçülikleýin önümçilige goýbermek meýilleşdirilýär diýip, NHK ýazýar.
Hyzmatdaşlyk wodorod stansiýalaryny döretmek ýaly infrastrukturanyň ösüşini-de öz içine alýar. Ýangyç elementlerinde işleýän awtomobiller energiýanyň wodorod arkaly öndürilýändigi sebäpli, kömürturşy gazyny çykarmaýarlar, bu hem olary adaty elektromobiller bilen deňeşdirilende ekologiýa taýdan arassa edýär.
Şeýle awtomobilleriň artykmaçlygy benzin awtomobilleri bilen deňleşip biljek geçýän menzilinden we ýangyç guýmagyň gysga wagtyndan ybarat. Ýöne wodorod awtomobilleriniň bazary üçin esasy kynçylyk olaryň bahasynyň ýokary bolmagy bilen baglanyşyklydyr. BMW we Toyota bilelikdäki işläp taýýarlamalaryň hasabyna önümçilik çykdajylaryny azaltmagy we ýangyç guýmak infrastrukturasyny kämilleşdirmek arkaly islegi artdyrmagy maksat edinýärler.
BMW-niň baş müdiri Oliwer Sipse kompaniýanyň wodorod ýangyjynda işleýän awtomobilleri giň auditoriýa üçin elýeterli etmäge ymtylýandygyny belledi. Toyota-nyň prezidenti Sato Kodzi hyzmatdaşlygy çuňlaşdyrmagyň wodorod jemgyýetini döretmäge ýardam etjekdigini aýtdy.
