Türkmenistanyň Ýaponiýadaky ilçisi A.Baýramow Tokioda Ykdysady hyzmatdaşlyk boýunça Ýapon-Türkmen toparynyň başlygy Hiroýuki Subai bilen duşuşdy.
Diplomatik wekilhananyň metbugat gullugynda habar bermeklerine görä, duşuşygyň barşynda 9-njy awgustda Astanada geçirilen "Merkezi Aziýa+Ýaponiýa" işewürler forumynyň netijeleri, şeýle hem Ykdysady hyzmatdaşlyk boýunça bilelikdäki Ýapon-Türkmen we Türkmen-Ýapon toparynyň 15-nji mejlisine taýýarlygy maslahatlaşdylar.
Taraplar özara ykdysady hyzmatdaşlygyň oňyn geljegini belläp geçdiler.
Şeýle hem şu hepdede ilçi A.Baýramow Ýaponiýa-Türki döwletler toparynyň wekili Tugrul Matsumoto bilen duşuşygy geçirildi. Duşuşykda ykdysady we medeni-ynsanperwer ugurlarda hyzmatdaşlyk, şol sanda 2024-nji ýylyň «Pähim-paýhas ummany Magtymguly Pyragy» diýlip yglan edilmegi bilen bagly Ýaponiýada medeni çäreleri geçirmek mümkinçilikleri ara alnyp maslahatlaşyldy.
Taraplar agzalan mümkinçilikleri kanagatlanma bilen belläp, ol ugurlar boýunça hyzmatdaşlygy dowam etdirmek isleýändiklerini aýtdylar.
