Pekiniň awiasiýa we kosmonawtika uniwersitetiniň Hançžou innowasiýa institutynyň ýanyndaky Tianmushan Laboratory-nyň hünärmenleri dünýäde ilkinji köp rotorly wodorod bilen işleýän drony üstünlikli synagdan geçirdiler. Tianmushan No.1 drony 1,5 sagatda 100 km uçup geçmek bilen, howada 4 sagada çenli durmaga ukyplydyr.
Dronyň korpusy uglerod süýüminden taýýarlanan bolup, bu onuň agramyny 19 kg-a çenli peseldýär, ýük göterijilik ukyby bolsa 6 kg-a ýetýär.
Tianmushan No.1 litiý batareýalaryndan 5-6 esse netijeli wodorod ýangyç elementlerini ulanýar. Dron adatdan daşary ýagdaýlarda ulanmak üçin niýetlenen paraşýut ulgamy bilen hem enjamlaşdyryldy.
Dron pes temperatura çydamly, bu ony gazaply howa şertlerinde ulanmaga mümkinçilik berýär. Ony, esasanam, nebit we gaz gözleglerinde, elektrik liniýalaryny barlamakda we tebigy baýlyklara gözegçilik etmekde ulanyp bolar. 2024-nji ýylyň ýanwar aýynda dron Içerki Mongoliýada -40℃-da üstünlikli synag edildi we 22-nji awgustda bolsa Tibetde 4500 metrden gowrak belentlikde synag edildi.
