Germaniýanyň Volkswagen awtoöndürijisi GFR-de zawodlaryny ýapmak we 2030-njy ýyla çenli işgärleri azaltmazlyk wadasyndan ýüz öwürmek mümkinçiligine seredýär. Bu barada kompaniýanyň önümçilik geňeşine salgylanyp, Financial Times ýazýar.
Kompaniýanyň ýolbaşçysy Tomas Şefer geçen ýyl işe girizilen çykdajylary azaltmak maksatnamasynyň bellenen maksatdan birnäçe milliard ýewro yza galýandygyny aýtdy. Netijede, Volkswagen ýitgilere sezewar bolýar diýip, geňeşiň başlygy Daniela Kawallo işgärlere iberen habarynda belledi.
“Şunuň bilen baglylykda geňeş Germaniýadaky zawodlary, VW-niň zähmet tölegi barada içerki umumy şertnamalaryny we 2029-njy ýylyň ahyryna çenli niýetlenen iş orunlaryny saklamak maksatnamasyny sorag astyna goýýar” – diýip, FT habary ýetirýär.
Germaniýanyň kanunyna laýyklykda, önümçilik geňeşleri iri kompaniýalaryň işgärleriniň bähbitlerini goramak we olaryň synçy geňeşleriniň işine gatnaşmak üçin saýlanýar.
Belläp geçsek, VW-de dünýä boýunça 650 000 töweregi adam işleýär, olardan tas 300 000 sanysy Germaniýadadyr. Volkswagen-iň adaty paýnamalary duşenbe güni söwdada 3,1%, aýratyn paýnamalary 2,2% gymmatlady.
