Volkswagen konserniniň ýolbaşçysy Oliwer Blýume 2028-nji ýyla çenli Ýewropada önümçilik möçberini ýylda takmynan ýene bir million awtomobil azaltmak meýilnamasynyň bardygyny mälim etdi. Bu çäre amaly çykdajylary peseltmäge gönükdirilen bolup, ol ilkinji nobatda Volkswagen we Audi markalarynyň bölümçelerine degişli bolar.
2025-nji ýylyň ahyryna bolan maglumatlara görä, konserniň kuwwatlyklary her ýyl 12 milliona çenli ulag öndürmäge mümkinçilik berýärdi, emma hakyky satuwlar hatda 9 milliona-da ýetmedi. Blýume häzirki kuwwatlyklary «artykmaç» diýip häsiýetlendirdi we öňki meýilleşdiriş modelleriniň durmuşa laýyk gelmeýändigini belledi. Onuň sözlerine görä, bazarlaryň durnukly bolan iň soňky döwri 2019-njy ýyldy, ondan soň bolsa geosyýasy faktorlaryň täsiri bilen ýagdaý has-da kynlaşyp başlady.
Işewürlige basyş edýän esasy sebäpler hökmünde administrasiýa ABŞ-nyň nyrh syýasatyny, Ýakyn Gündogardaky gapma-garşylyklary we Hytaýdaky barha artýan bäsdeşligi görkezýär.
Kadalaşdyrmagyň çäginde Volkswagen Ýewropadaky ýüki az bolan zawodlarynyň birini satmak mümkinçiligini we Hytaý bazaryndaky şowly tejribesine eýerip, beýleki kompaniýalar bilen hyzmatdaşlygy giňeltmegi öwrenýär.
Çökgünlik alamatlaryna garamazdan, Oliwer Blýume konserniň «täze kadalara» uýgunlaşmaga ukyplydygyna ynam bildirdi.
