Old Trafford stadionynda Angliýanyň Premýer-ligasynyň “Mançester Ýunaýted” bilen “Liwerpulyň” arasyndaky oýny geçirildi. Duşuşyk “Liwerpulyň” peýdasyna 3:0 hasabynda tamamlandy.
Toparyň ýeňiş gazanmagyna öz hasabyna bir gol we iki assist ýazan müsürli hüjümçi Mohamed Salah uly goşant goşdy. Oýundan soň Salah klubdaky soňky ýyly we şertnamany uzaltmak teklibiniň ýokdugy barada aýtdy.
“Bilşiňiz ýaly, bu meniň klubda soňky ýylym. Men diňe lezzet almak isleýärin we bu barada pikir etmek islemeýärin.
Klubda hiç kim meniň bilen şertnama barada heniz gürleşmedi, şonuň üçin men soňky möwsümimi oýnaýaryn, möwsümiň ahyrynda bolsa göreris. Häzirlikçe bu meniň “Liwerpul” üçin Old Traffordaky soňky oýnum” – diýip, Salah aýtdy.
Belläp geçsek, Salahyň “Liwerpul” bilen şertnamasy 2025-nji ýylyň tomsuna çenli hereket edýär. Ol toparda 2017-nji ýyldan bäri çykyş edýär we onuň üçin 351 oýunda 213 gol geçirdi.
