Ýaponiýadan 37 ýaşly Saki Tamogami özüniň haýran galdyryjy pul tygşytlamak ukyby bilen “ýurduň iň tygşytly gyzy” hökmünde belli boldy. Ol günde iýmit üçin bary-ýogy $1,4 sarp edip, 15 ýylda üç öý satyn almagy we pişik kafesini açmagy başardy diýip, South China Morning Post habar berýär.
Tamogami 34 ýaşyna çenli üç öý satyn almagy maksat edinip, 19 ýaşyndan öz zähmet hakynyň ep-esli bölegini ýygnamaga başlady. Uniwersitetden soň ol gozgalmaýan emläk boýunça agent hökmünde işledi. Onuň gündelik iýmiti ýönekeý tagamlardan ybaratdy, ol iýmit üçin 35 sentden köp çykdajy etmeýärdi, egin-eşigi garyndaşlaryndan alýardy, mebeli bolsa köçeden tapýardy. Ol 27 ýaşynda ilkinji öýüni satyn alyp bildi, 2019-njy ýyla çenli bolsa üçünji öýüni satyn alyp, arzuwyna ýetdi. Bu jaýyň birinji gatynda Cafe Yuunagi ady bilen pişik kafesini açdy.
Häzir bu kafe Tamogamä öz işini ösdürmäge we haýwanlar barada alada etmäge mümkinçilik berýär. Maliýe erkinligine garamazdan, Tamogami tygşytlylyk ýörelgesine eýermegini dowam etdirýär we gozgalmaýan emläge maýa goýmagy meýilleşdirýär.
