24-nji awgustda Astrahanda "Hazar möwsümleri" nusgawy sungat festiwalynyñ çäklerinde Türkmenistanyñ güni bellenildi.
Orient agentliginiň habar bermegine görä, Astrahan filarmoniýasynyň sahnasynda ýurdumyzyň saz sungatyny Türkmenistanyň halk artisti wokal aýdymçysy Atajan Berdiýew, pianinoçy, milli we halkara ýaryşlaryň ýeňijisi Aşyr Aşyrow hem-de "Aşgabadyň kameratasy" kameraçy topary tanyşdyrdylar. Konsertiň maksatnamasyna dünýä we milli nusgawy saz eserleri, meşhur aýdym repertuary girdi.
Çärä Türkmenistanyň Russiýa Federasiýasyndaky Konsullygynyň (Astrahan ş.) işgärleri, şäher dolandyryşyň ýolbaşçylary, türkmen diasporasynyň wekilleri, ýokary okuw mekdepleriniň mugallymlary we talyplary, festiwalyň myhmanlary we köpsanly astrahanly ýaşaýjylary gatnaşdy.
Mundan başga-da, Astrahan filarmoniýasynyň girelge zalynda türkmen diplomatik edarasy tarapyndan Magtymguly Pyragynyň doglan gününiň 300 ýyllygyna bagyşlanylyp sergi gurnaldy.
