Lebap welaýaty kabul edilen döwlet maksatnamalarynyň çäklerinde täze okuw ýylyna taýýarlyk işlerini üstünlikli durmuşa geçirýär.
"Türkmenistan: Altyn asyr" elektron neşiri welaýat boýunça täze okuw ýylyna taýýarlygyň barşy bilen bagly maglumatlary getirýär:
- welaýat boýunça jemi 396 sany umumybilim berýän orta mekdepler hereket edýär, olaryň 4-si mekdep internatlary;
- Çagalar-ýetginjekler döredijilik öýleriniň 18 sanysy hereket edýär;
- 2024/2025 okuw ýylynda mugallymlaryň 21 müň 40-a golaýy bilim-terbiýe berer;
- welaýatda mekdebe çenli bilim edaralarynyň 384 sanysy bar, bu ýerlerde terbiýeçileriň we beýleki hünärmenleriň 4 müň 890-dan gowragy körpelere bilim-terbiýe berýär
- täze okuw ýylynda ýaş hünärmenleriň 1040-a golaýy işe ýerleşdirildi;
- welaýat boýunça aýratyn derslere ýöriteleşdirilen mekdepleriň 38 sanysy hereket edýär.
Bellenilişi ýaly, Lebap welaýatynda hereket edýän orta mekdepleriň, şeýle hem mekdebe çenli çagalar edaralarynyň ählisinde awgust aýynyň başyna çenli ýeňil abatlaýyş-bejeriş işleri doly tamamlanyp, täze 2024 – 2025-nji okuw ýylyna taýýar edilipdir. Möwsümde umumybilim berýän orta mekdeplere döwlet býujetiniň hasabyna 300 tonna sement alnyp berildi. Netijede mekdep binalarynda abatlaýyş-bejeriş işleri bellenilen möhletde ýerine ýetirildi.
Şeýle hem mekdepleriň 1-nji synplaryna kabul ediljek çagalar üçin Türkmenistanyň Prezidentiniň sowgady – «Noutbuk» kompýuterleriniň 30 müň 90 sanysy alnyp, olar degişli etrap bilim bölümlerine paýlanylyp berlipdir we şu ýyl mekdep bosagasyndan ilkinji gezek ätlejek okuwçylara gowşurmaklyga taýýar edilipdir.
Welaýatda täze okuw ýylyna badalga beriljek Bilimler we talyp ýaşlar gününde Saýat etrabynyň Merýe geňeşliginiň «Alpan» obasynda 400 orunlyk, Hojambaz etrabynyň Galkynyş geňeşliginiň «Olam» obasynda hem 960 orunlyk ähli amatlyklary bolan, häzirkizaman enjamlary bilen üpjün edilen umumybilim berýän orta mekdepleriň täze binalary dabaraly ýagdaýda açylyp ulanylmaga berler.
