Portlendiň halkara howa menzilinde (Oregon ştaty) meýdany 3,6 gektar bolan agaç üçekli täze esasy terminal açyldy. Bu ABŞ-da uly agaç gurluşyk desgalaryny ulanan ilkinji iri howa menzilidir diýip, New Atlas habar berýär.
Özboluşly desga ZGF Architects binagärlik kompaniýasy tarapyndan döredildi.
Ýerli agaçdan ýasalan üçegiň agramy 8 million kg. Işläp duran howa menzilinde amatsyzlyklary azaltmak üçin inženerçilik ulgamlaryny we 49 sany yşyk lýuklaryny öz içine alýan üçek zawodda öňünden ýygnaldy.
Howa menzilini giňeltmegiň taslamasy öň aýry duran üç binany bir üçegiň astyna jemledi. Üçegi otuz dört sany seýsmoizolýasiýaly Y şekilli sütünler saklaýar, bu gurluşa 9 bally ýer titremelere çydamly bolmaga mümkinçilik berýär.
Terminalyň içerki görnüşi Place landşaft dizaýn şereketi bilen bilelikde işlenip düzüldi we 72 agaçdan, kaskad baglaryndan we 5000-den gowrak ösümlikden ybarat.
Howa menzilini giňeltmek işi - 2 milliard dollarlyk düýpli abatlaýyş işleriniň bir bölegidir. Taslama Portlendiň pyýadalara niýetlenen köçelerini ýada salýan oňat gurşaw döretmeklige gönükdirilendir. Ähli işler tamamlanandan soň, howa menziliniň kuwwaty iki esse artar we howa menzili 2045-nji ýyla çenli ýylda 35 million ýolagça hyzmat edip biler.
Şol bir wagtyň özünde, Amerikanyň Birleşen Ştatlary dünýäniň iň beýik gökdirän agaç binasyny gurmagy meýilleşdirýär.
