Bolgariýanyň kenarýaka zolagynda ýaşy, takmynan, 1700 ýyl töweregi bolan gadymy rim sarkofagy adaty stol hökmünde ulanylypdyr. Bu täsin açyşy Warna şäheriniň golaýynda Gara deňziň kenaryndaky Keramatly Konstantin we Ýelena kenarynda dynç alýan öňki polisiýa işgäri ýüze çykarypdyr. Ol stoluň üstünde üýtgeşik bezegleri görüp, bu barada ýerli häkimiýetlere habar beripdir diýip, Daily Mail habar berýär.
Arheologlar bu ýere gelip, balykgulakdan ýasalan sarkofagyň Gadymy Rim döwrüne degişlidigini tassykladylar. Daş tabydyň gapdallary gülleriň we haýwanlaryň barelýefleri, gülçyralar we paltalar bilen bezelipdir. Sarkofagyň gapagy gelýänler üçin bar stoly bolup hyzmat eden daş plita bilen çalşyrylypdyr.
Aleksandr Minçewiň ýolbaşçylygyndaky arheologiki topar sarkofagyň biziň eýýamymyzyň II asyryna degişlidigini kesgitledi. Artefakt has giňişleýin öwrenmek üçin Warnadaky arheologiýa muzeýine äkidildi.
Bolgariýada arheologiki ähmiýeti bolan islendik zat döwlete degişlidir we muzeýe geçirilmelidir. Şunuň bilen baglylykda, deslapky derňew işleri alnyp barylýar. Polisiýa sarkofagyň 2020-nji ýyldan bäri bu ýerde durandygyny anyklady, ýöne onuň gelip çykyşy näbelliligine galýar, sebäbi bezeliş täri sebitde tapylan beýleki rim artefaktlaryndan tapawutlanýar.
