ABŞ-nyň Volkswagen Group kompaniýasy tarapyndan döredilen çalt zarýad beriş stansiýalarynyň ulgamy bolan Electrify America Kaliforniýanyň iň gelim-gidimli on stansiýasynda elektrik ulagynyň zarýadyny 85%-e çenli çäklendirmek synagyny geçirer. Munuň sebäbi terminaly uzak wagtlap saklaýan sürüjilere – “zarýady iýijilere” garşy göreşmek diýip, Carscoops ýazýar.
Kompaniýanyň prezidenti Robert Barrosyň aýtmagyna görä, 80%-e zarýad tiz dolýar, ýöne galan soňky 20%-ini doldurmak ep-esli wagt alýar. Electrify America köp sanly elektrik ulaglarynyň eýeleriniň muny bilmeýändiklerini we doly zarýad bermek üçin ýokary güýçli stansiýalary ulanyp, beýleki sürüjilere zerur bolan terminaly saklaýandyklaryny nygtaýar.
Synag ulag 85% zarýad alandan soň, sürüjiniň terminaly boşatmak üçin 10 minut wagtynyň boljakdygyny göz öňünde tutýar. Ondan soň her minut üçin sürüjiden 40 sent alnar.
Electrify America-nyň belleýşi ýaly, stansiýalarda aşa köp elektrik ulaglarynyň bolmagy Hyundai we Mersedes-Benz ýaly köp awtoulag öndürijileriniň müşderilerine mugt zarýad bermegi bilen baglanyşykly bolup biler.
Volkswagen dizel dawasyna (“Dizelgate”) çözgüt hökmünde 2016-njy ýylyň ahyrynda Electrify America-ny esaslandyrdy. Ilkibaşda oňa 2 milliard dollar maýa goýuldy. Bu ulgam 47 ştatda 890-dan gowrak stansiýalaryň 350 kW kuwwatlylygy bolan terminallaryny öz içine alýar.
