Toyota kompaniýasy awtoulaglaryň sertifikatlaşdyryş prosesindäki näsazlyklar esasynda dörän dawa jogap hökmünde täze düzgünleriň girizilendigini habar berdi. Kompaniýa heläkçilik synaglarynyň sertifikatlaşdyrylyşyna ýolbaşçylaryň ýeterlik derejede gatnaşmandygyny we prosesde kemçilikleriň ýüze çykandygyny boýun aldy diýip, Motor1 habar berýär.
Täze meýilnama laýyklykda, Toyota-nyň baş tehniki işgäriniň we önümleriň hili boýunça baş müdiriniň ygtyýarlyklary artdyrylar.
Şeýle hem kompaniýa düzgünleriň berjaý edilişine gözegçilik etjek we baş howpsuzlyk gullugyna hasabat berjek kanuny gözegçi wezipesini girizýär. Kompaniýa maglumat dolandyryş ulgamyny gözden geçirmegi we has anyk kadalary girizmegi meýilleşdirýär.
Bu dawa sebäpli ýylyň başynda Toyota Yaris Cross, Corolla Axio we Corolla Fielder modelleriniň önümçiligi togtadyldy. Olaryň önümçiligini sentýabr aýynda gaýtadan başlamak meýilleşdirilýär.
