Parižde XXXIII tomusky Olimpiýa oýunlary tamamlandy. Ýaryşlaryň soňky gününde, 11-nji awgustda 13 medal toplumy paýlandy.
ABŞ jemleýji gün altyn medalyň sany boýunça Hytaý bilen deňleşdi (40), ýöne amerikalylaryň hasabynda kümüş (hytaýlylaryň 27 medalyna garşy 44) we bürünç medal (24-e garşy 42) köpdi, şonuň üçin umumy sanawda ABŞ birinji orna çykdy.
Günüň esasy wakalary:
Ýeňil atletika: Niderlandly zenan ylgawçy Sifan Hassan marafonda (42,195 km) 2 sagat 22 minut 55 sekunt netije bilen Olimpiýa rekordyny goýdy. Hassan üç uzak distansiýada – 5000 m, 10 000 m we marafonda Olimpiadanyň altyn medalyny alan ilkinji zenan boldy. Ahyrynda ol bu aralykda dünýä rekordynyň eýesi efiopiýaly Tigst Assefadan öňe geçmegi başardy. Bürünç medaly keniýaly Helen Obiri aldy.
Basketbol: ABŞ-nyň zenanlar ýygyndysy finalda Fransiýanyň toparyny 67:66 hasabynda utup, altyn medal aldy. Amerikalylar taryhda onunjy we yzygider sekizinji gezek Olimpiadada ýeňiji boldular. Olardan başga-da, Oýunlarda altyn medaly SSSR-iň basketbolçylary (1976, 1980) we 1992-nji ýylda SSSR-iň öňki respublikalarynyň Birleşen topary aldy.
Amerikan ýygyndysynyň hüjümçi goragçysy, 42 ýaşly Daýana Taurazi taryhda sportuň toparlaýyn görnüşlerinde ilkinji alty gezek Olimpiýa çempiony boldy.
Woleýbol: Italiýanyň zenanlar ýygyndysy ABŞ-nyň toparyny üç setde utdy – 3:0 (25:18, 25:20, 25:17).
Häzirkizaman bäş görnüşli ýaryş: Olimpiýa altyn medalyny wengriýaly Miçelle Guýaş aldy.
Ykdysadyýet: Pariždäki Olimpiada XXI asyrda tomusky Oýunlaryň arasynda iň arzan düşen ýaryşlar boldy. Ol Pekindäki Oýunlar-2008-den dört esse arzan boldy. Guramaçylar eýýäm bar bolan meýdançalary ulanyp, täze desgalaryň gurluşygyna çykdajy etmediler. Bu Oýunlary diňe bir tygşytly däl, eýsem ekologiýa taýdan arassa etmäge mümkinçilik berdi.
Diňe Sportuň suw görnüşleri üçin merkez we Olimpiýa obasy guruldy, olara $9,7 mlrd möçberdäki býujetiň 80%-i sarp edildi. Ilkibaşda býujet, takmynan, $6,8 mlrd bolupdy. Guramaçylar artykmaç çykdajylaryň inflýasiýa bilen baglanyşykly bolandygyny belleýärler.
Indiki tomusky Olimpiýa oýunlary 2028-nji ýylda Los-Anjelesde (ABŞ) geçiriler.
