Serbiýanyň Prezidenti Aleksandr Wuçiç ýakyn wagtda ýurtda tennisçi Nowak Jokowiçiň muzeýiniň gurluşygynyň başlanjakdygyny mälim etdi. Bu barada ýerli N1 teleýaýlymy habar berýär.
Wuçiçiň aýtmagyna görä, deslapky maslahatlaşmalar eýýäm geçirildi we muzeý ýene bir milli ajaýyplyga öwrüler.
“Palma-de-Maýorka şäherinde tennisçi Rafael Nadala bagyşlanan muzeý bar. Biz Jokowiçiň ýurdumyzyň taryhyna goşan goşandyny mynasyp görkezmäge we jahankeşdeleri çekmäge synanyşarys. Nowak sportuň bu görnüşinde Nadaldan gowy. Ol diňe bir şu ýerde däl, eýsem, aýdaly, Hytaýda-da örän meşhur. Mysal üçin, eger siz Jokowiçiň raketkasyny hytaýly bir döwlet işgärine sowgat berseňiz, ol ony kabul edip bilmez, sebäbi bu diýseň gymmatly we ähmiýetli sowgat hasaplanar” – diýip, Wuçiç aýtdy.
Ýatlap geçsek, ýekşenbe güni Jokowiç Pariždäki Olimpiýa ýaryşynyň finalynda ispaniýaly Karlos Alkarasdan üstün çykyp, ilkinji gezek Oýunlaryň altyn medalyny gazandy.
