4-nji awgustda italiýaly tennisçiler Ýasmin Paolini we Sara Errani öz ýurduna uly üstünlik getirdiler. Olar taryhda tennis ýaryşynda Olimpiýa oýunlarynyň ilkinji altyn medalyny gazandylar.
Pariždäki Olimpiada-2024-üň final duşuşygynda olar russiýaly tennisçiler Mirra Andreýewa bilen Diana Şnaýderi 2:6, 6:1, 10:7 hasabynda utdular.
Dünýäniň bäşinji raketkasy Paolini mundan öň 2024-nji ýylda “Rolan Garrosyň” we “Wimbledonyň” finalyna çykypdy. Errani bolsa Roberta Winçi bilen jübüt görnüşde karýera “Tuwulgasynyň” eýesidir.
Belläp geçsek, bu Italiýanyň milli ýygyndysynyň Pariždäki Olimpiadada tennis boýunça ýeke-täk medaly däl. Mundan öň, dünýäniň 16-njy raketkasy Lorenso Muzetti öz ýurduna soňky 100 ýylda tennis boýunça ilkinji Olimpiýa medalyny getirdi. Erkekleriň arasynda ýekelikde üçünji ýer üçin oýunda Muzetti kanadaly Feliks Ože-Alýassimi 6:4, 1:6, 6:3 hasabynda utup, bürünç medal gazandy. Soňky gezek 1924-nji ýylda Parižde geçirilen Olimpiýa oýunlarynda Uberto de Morpurgo hem bürünç medal gazanypdy.
Erkekleriň arasynda ýekelikde çempion karýerasynda ilkinji gezek serbiýaly Nowak Jokowiç boldy, kümüş medaly ispaniýaly Karlos Alkaras aldy.
