6-11-nji awgust aralygynda Wengriýada Türkmenistanyň Medeniýet günleri geçiriler.
Türkmenistan Habarlar portalynyň beýan etmegine görä, ýurdumyzyň meşhur halk we estrada aýdymçylaryndan, sazandalaryndan, folklor ussatlaryndan, medeniýet işgärlerinden, kino, muzeý işiniň wekillerinden, şeýle hem žurnalistlerinden ybarat wekiliýet Wengriýa sapar bilen barar.
Forumyň açylyş dabarasy 7-nji awgustda Budapeştde Miras öýünde geçiriler. Şeýle hem bu ýerde muzeý gymmatlyklarynyň, şekillendiriş we amaly-haşam sungatynyň eserleriniň sergisi hem-de milli we döwrebap geýimleriň görkezilişi geçiriler. Agşam Türkmenistanyň sungat ussatlarynyň konserti guralar.
Maksatnamanyň çäklerinde Magtymguly Pyragynyň 300 ýyllygyna bagyşlanan çäreler, Türkmenistanyň Prezidentiniň gadymy Änewe bagyşlanan kitabynyň tanyşdyrylyşy, türkmen kinolarynyň görkezilişi bolar.
Medeniýet günleriniň çäreleri Baç-Kişkun sebitinde dowam eder. Bu ýerde Magtymguly Pyragynyň ýadygärliginiň açylyşy meýilleşdirilýär.
Medeni çäreler 11-nji awgustda konsert bilen tamamlanar.
