30-njy iýuldan Gonkongda we Makaoda syýahat toparlarynyň düzüminde bolan daşary ýurt raýatlary Hytaýyň Haýnan welaýatyna wizasyz barmak mümkinçiligine eýe boldular. Degişli karar Hytaýyň Döwlet immigrasiýa edarasy tarapyndan kabul edildi diýip, Sinhua agentligine salgylanyp, TASS habar berýär.
Täze düzgünlere laýyklykda, Gonkongdan we Makaodan gelen syýahatçylar Haýnanyň çäginde wizasyz 144 sagat galyp bilýärler. Şol bir wagtyň özünde, olaryň Hytaýyň beýleki sebitlerine gitmäge hukuklary ýok. Syýahat toparlary azyndan iki adamdan ybarat bolmaly we olaryň ählisi bilelikde girmeli we gitmeli.
2000-nji ýylda Haýnanda 21 ýurduň syýahatçylary üçin wizasyz režim girizildi. 2018-nji ýylyň maý aýyndan sanaw 59 ýurda çenli giňeldildi. Täze düzgün girizilmezden öň, wizasyz 30 güne çenli möhlet bilen Haýnana 40 Ýewropa, 11 Aziýa ýurdundan, Demirgazyk we Günorta Amerikanyň 6 ýurdundan, şeýle-de Awstraliýadan we Täze Zelandiýadan syýahatçylar gelip bilýärdi.
2025-nji ýyla çenli Hytaý Haýnany “halkara syýahatçylyk we sarp ediş merkezine” öwürmegi maksat edinýär. “Gündogar Gawaýi” hökmünde tanalýan bu ada özüniň tebigy peýzažlary, tropiki tokaýlary, ösen myhmanhana ulgamy, suwa düşülýän kenarlary we 1,9 müň km-den gowrak uzalyp gidýän kenarýakasy bilen meşhurdyr.
