Microsoft Azure bulut platformasy 30-njy iýul agşamsy ýene-de global bökdençlige sezewar boldy. Psm7-niň berýän habaryna görä, bökdençlik 10 sagat töweregi dowam edip, platformanyň bütin dünýädäki müşderilerine, şol sanda Amerika, Aziýa-Ýuwaş ummany, Ýewropa we Ýakyn Gündogar sebitlerine täsir etdi.
Microsoft kompaniýasy Outlook, Intune we Entra ýaly Microsoft 365 hyzmatlaryna giriş we öndürijilik bilen baglanyşykly näsazlyklary tassyklady. Bu näsazlyk meşhur Minecraft oýnuna hem täsir etdi.
Gözegçilik çeşmeleri, Angliýanyň kazyýet ulgamyndan başlap, Niderlandlaryň “Twente” futbol klubunyň oýunlaryna petek satmak hyzmatyna çenli müňlerçe internet sahypalarynda näsazlygyň täsirini hasaba aldy.
Microsoft bökdençligiň howpsuzlyk çärelerini ýerine ýetirmekde ýalňyşlyk bilen güýçlenen DDoS hüjümi sebäpli ýüze çykandygyny aýtdy. Kompaniýa ötünç sorap, meseläniň çözülendigini mälim etdi.
Bu bökdençlik CrowdStrike kiberhowpsuzlyk programmasynyň täzelenmegi bilen baglanyşykly global Windows şowsuzlygyndan iki hepde geçmänkä ýüze çykdy.
Windows şowsuzlygy Amerikanyň CrowdStrike kompaniýasynyň platformalarynyň birini täzelemegi bilen baglanyşyklydy. Kompaniýanyň uly tehniki kynçylyga sezewar bolmagy, kärhanalara, awiakompaniýalara, köpçülikleýin habar beriş serişdelerine, döwlet edaralaryna we beýleki guramalara täsir etdi.
