Stol tennisinde çykyş edýän Lýuksemburgdan 61 ýaşly Ni Sýalýan Parižde dowam edýän Olimpiýa oýunlarynda ýaş rekordyny goýdy.
Sýalýan stol tennisi boýunça ýaryşyň ikinji tapgyrynda 31 ýaşly türkiýeli türgen Sibel Altynkaýany utdy. Oýun 49 minut dowam edip, Sýalýanyň peýdasyna 4-2 hasabynda tamamlandy.
Şeýlelikde, Sýalýan Olimpiadadaky oýunda ýeňiş gazanmagy başaran stol tennisi boýunça iň uly ýaşly oýunçy boldy.
Ni Sýalýanyň asly Hytaýdan we ol tomusky Olimpiýa oýunlaryna altynjy gezek gatnaşýar. Onuň hasabynda 1983-nji ýylyň dünýä çempionatynda toparda we mikstde iki altyn medal, şeýle-de 1998-nji we 2002-nji ýyllaryň Ýewropa çempionatlarynda üç altyn medal bar.
Stol tennisi boýunça ýaryş 10-njy awgustda tamamlanar, şol gün zenanlaryň arasynda üçünji ýer ugrunda we final oýunlary geçiriler. Erkekler baýrak üçin bir gün öň bäsleşerler.
